褪色的決賽，大師級的科蘭。

世界盃決賽場面向來傾向保守，這我早就有準備。但今屆決賽，可能是我看過最低水準的，保守得來，防守卻很差。五成的西班牙，七成的荷蘭，讓人更懷念偉大的烏拉圭和科蘭。

上半場誰最搶鏡？肯定是光頭佬球證。在場上喋喋不休，婆婆媽媽地教仔講耶穌，博到最多近鏡大頭，上鏡率僅次於金色皮球。他的黃牌，係就俾，唔係都俾，結果發牌用去10分鐘。荷蘭粗野，早就料到，球證不留情是好，但踢不中都要掏黃牌，嚴重性原來跟穿心腿同級。眨眼完上半場，我進廁所撒尿時，只記得拉莫斯開場的頭槌攻門，還有洛賓完場前的地波遠射。慘。

西班牙水準大跌，不是源自荷蘭的緊逼防守，其實那些防守哪裡緊湊了？西班牙低迷，也不是因為荷蘭粗野，空間還是有不少的。鬥牛佬面對實力比德國明顯為低的對手，中前場忽然集體失魂，表現緊張、怯場、無自信，進攻時中場不敢壓前，拖後組織也完全無法運轉。後防又鬆散如豆腐渣，洛賓2球單刀不進，除了聖卡西應記一功，真是好運氣。

那邊荷蘭踢得平庸粗野是意料中事，沒什麼好說的，中場所謂緊逼其實不緊，偶爾的蘇格蘭式長傳急攻也不見得怎麼急，全隊除了龍門只有洛賓最有誠意，對面則是恩尼斯達，但偏偏都是在水準之下。恩尼斯達等人多次面對龍門不敢起腳，心理壓力有多大，可想而知，這直接令決賽觀賞性失色不少。天知道地上技戰術最強，心理素質卻最差的巴西，如果進入決賽會否踢得更難看。

除了最後的進球，全場還是有眾多興奮點的，只可惜都是起源於後衛們的發夢，然後終結於前鋒們的低效。高潮位還是存在，但不是建築在技戰術上。壓力、球證和粗暴令決鬥變得如此平庸，但論足球傳統，西班牙佬和荷蘭佬都值得贏一次金盃，所以還是要恭喜西班牙，祝賀荷蘭。

謝謝大師迪布斯基的換人，挽救了120分鐘的場面，也順便證明了世界上最不懂足球的，原來是冠軍國度的皇家馬德里高居廟堂者。真他媽的諷刺。

無壓力的季軍戰，賽前公佈出場名單，德國無拿姆、高路斯，還相信烏拉圭應該可以贏一球，可惜足球太多意外，我預計烏拉圭贏3：2，和3：3的歷史，都被他們自己人改寫了。德國球迷要感謝章魚阿Paul，不如感謝烏拉圭的門將梅斯利拿，我好想知他在球場上想著什麼。

各位新球迷，睇波，通常從前鋒睇起，因為有入球較有吸引力。所以今場真係要睇科蘭，睇得明科蘭點踢，輸，都已經贏左享受。我會永遠懷念Forlan，今晚示範了世界級前鋒的射門、傳送、節奏、無球跑動，每一方面都可以寫入足球教科書，他是這兩天最令我感動的球員，也是唯一讓我感到『看著你踢，就是享受』的球員，祝賀他贏得金球獎，他有資格跑在兩隊決賽隊伍的球員前面，正如朋友說：『這是FIFA今年絕無僅有的好決定。』

順便想念一下蘇加、波班、李安納度、史岱哲戈夫、赫傑、李華度、阿林姆、加拉卡、奇連士文、禾拉、巴迪斯圖達、列當度、巴治奧、馬勒當拿、史杜高域、羅馬里奧、哈根沙斯、戴維斯、柏金、朗拿度、施丹......一屆不如一屆。

終於到了終結一刻，借朋友一句話總結南非世界盃：『今屆最差唔係球賽、唔係球證，而係有線班講波佬。』

世界盃後遺症悄悄發作了。

狂呼我空虛。

世界盃終於戰到16強，同波友打下牙較。

一）
西班牙真係唔似冠軍，甚至唔似可以入四強。頭場輸波，瑞士死守，還有像樣的攻勢；二場真係無料到，節奏太慢。三場對智利，我好有信心西班牙贏唔到，以歐洲冠軍而論，上半場應該用接近垃圾來形容，有些時候場面甚至很意大利，很法國，跟面對巴西的朝鮮差不多吧，被完全壓制在半場。韋拿就像鄭大世，孤軍作戰，費托連洪映早都不如。
如果不是智利龍門白痴，葬送好開局，球證離奇紅牌趕走一個，西班牙很可能要跟意法番地中海渡假。

下半場，引以為傲的韋拿把握力都無埋，難道真係西甲雙雄太累，但個個球隊都要搏聯賽架啦。睇左三場，呢隊西班牙憑MUG奪冠？我真係R爆頭都唸唔到。
我都希望西班牙踢得好，大佬，我都寧願睇進攻，好過瑞士、希臘呢種防守神話。但老實講，真係唔好寄望費托突然爆發喇，咁即係等運到，某程度即係等死。拿拿臨用FIT既替補路蘭迪啦，往下唔輸得架喇。

迪布斯基應該唸唸當年意大利國家隊永遠的大賽廢柴迪比亞路，姖打正選對法國個屆，如果放巴治奧正選，法國98皇朝好可能已經唔存在。仲有得救，唔好猶豫喇！

二）法國同意大利點廢柴，就唔使浪費口水，含淚啦。唔怪得球員，要怪就怪教練，尤其係條粉皮杜明尼治。

三）
阿根廷，正選陣容打得好悅目，做球迷最喜歡。場面好，加上有運，國際足協同球證已經承認，對尼日利亞入波犯規在先，對南韓第三球明顯越位，但冠軍就係需要場面加運氣。





不過阿根廷防實在令人好擔心，著名既炸彈人迪米捷利斯，完全將係拜仁既『穩定性』帶到國家隊，森美爾傷勢未明，如果丟掉冠軍應該是攻強守弱的報應。用華朗，真係唔知係對係錯。希望老馬走得愈遠愈好。

四）
巴西班波一路未開盡火力，不知有多少底氣。與其說寄望卡卡，不如說寄望邊路進攻，但卡卡回歸跡象好過費托，如果上力，都幾恐怖。





睇咁耐波，都未見過世界盃最好既然防線竟然出現係巴西，奇蹟。16強後希望唔好再贏波收皮送波俾人入。雷斯奧真係愈看愈喜歡，真係我心目中第一中堅，睇姖踢，真係好過癮。我覺得姖應該贏一次歐洲足球先生。法比安奴去AC米蘭，米蘭有救、細哨有救。真係好希望見到細哨，鄧加你有三場兩短，番到巴西，唔該除定底褲，大把球迷排緊隊等你。











五）
三隊球隊好可惜。喀麥隆首場內訌，對日本出半隊莫名其妙既副選，兩隊鬥屎波，合理地輸，種下含淚禍根。第二場對丹麥，上演本屆世界杯最精彩一戰，係山寨版98年丹麥攻巴西，或者巴西隊荷蘭（係咪98？）。今屆竟然由兩隊二線波演繹進攻足球，足壇同所謂列強真係好折墮。





丹麥，防守穩固，但攻擊夠進取，機動性，中場有組織，突擊有效率，真係樣樣平均。點知日本仔突然C朗、細哨輪流上身，兩個決賽週僅見既罰球世界波，就咁黯然番老家喞牛奶。





智利，狂攻西班牙，幾乎令90%球迷跌爆眼鏡，半隊紅黃牌悲壯出線。兩個正選中堅停賽，雖然有兩個中場正選復出，但要鬥巴西。無論輸贏，以智利的瘋狗咁既踢法，都一定會好睇，我強烈推薦，應該係16強最好睇既一場。進攻處理好尾二那腳，不愁無波入。但始終係鬥老對手巴西，唯有等法比安奴奠一杯熱酒，為南美同胞在狂風中送行。





六）
卡比路係有冠軍命，但我唔信英格蘭可以奪冠，但卡比路又真係咁樣帶過好多隊冠軍，吹脹。上場對二流球隊贏波出線，不能作參考。對波0羊問題，只講林謝組合太片面，係球星級數吹大左？我唔明，大家唔明，相信英格蘭足總都唔明。R頭。











七）
德國上場對加納，人地當正係非洲草原俾獅子追殺咁，瘋狂加速打閃電戰，後防立刻漏洞百出，將弱點曝露於天下。有線班二流講波佬仲叫路夫將對波提速同獅子鬥快。陰功，同加納玩速度，真係想送德國一程。好在路夫有貨，夠冷靜，玩耐性拖慢節奏打順0的傳送。如果唔係，我真係打電話去有線投訴。但最慘係卡比路個老奸巨MUG很都睇到曬，下場就龜縮兩翼放狗爆你，死未？講真，我唔想姖死，但真係驚姖會死。





八）
有線講波佬真係好渣，淪為悶波笑談話資。大家心照。建議睇64台肥彭豬UP好過，仲好笑。





九）
雖然世界盃成日所謂爆冷，但係你睇翻16強名單，其實都算幾合理。無料如意大利法國，仲有同級渣既南非、希臘、塞爾維亞都玩完；有heart如美國、斯洛伐克可以拼搏晉級。美國真係抵睇；好波如烏拉圭、智利仲未死得，其中烏拉圭應該係四強分子。





十）
荷蘭分組賽節奏太慢，太『笠』，走位唔夠機動，中場都站樁式咁滯，後防我無信心，咁踢遲早死。但後備兩匹快馬艾利亞、艾費利，一黑一白，雙鬼拍門，有驚喜。雲佩斯逐漸上力，洛賓復出可以加快節奏，仲有潛力，未見底。

十一）
今屆希望決賽阿根廷對巴西，華麗阿根廷因為真係好睇，悶蛋巴西係因為跟紅頂白無選擇。邊個贏無所謂。當然，最好踢得華麗個隊贏，就最滿足。

懷舊：朋友，好去好回。

最近寫文，翻看三年前的Blog，發現不少相熟的同事都已經離開了。有些在香港，有些在他鄉。當年在Blog上的影像，都是跟他們首次搭檔的記錄。這才猛然發現，這些日子被facebook荼毒太深，一浪浪的更新，一浪浪的遺忘。原來，Blog的記錄方式，遠比Facebook那種快閃式高潮來得可貴。

四姐，好去好回。

元洲街：消失的街道．逝去的生活 2007/07

數十年來，統治着深水埗元州街居民生活模式的，不是封閉的商場或倒模式連鎖店，而是街舖店主和唐樓居民的親切耳語。你送我茶葉蛋，我贈你香橙；你來舖裏坐坐，我到樓上聊聊，厚厚的日曆換了又換，外面世界在變，這裏人情如昔。

直至2004年，房協公布「深水埗K20-23」4項重建項目，街名和溫厚人情全變成政府檔案的冰冷數字，百年歷史的醬醋舖被質問「你無非要錢，開個價啦」；天台屋老住客被警告「唔搬就拉你坐監」；凝聚三代心血的老茶莊突然變成「霸佔官地」，老店主當場嚇暈。

淚珠凝成動力，街坊成立關注組互相照應，漸漸發現埋在自己家園的故事竟是如此吸引，大家雖是重建法例的受害者，可世上還有公義與「居民權益」。「我們或許會被犧牲，但經驗可以幫助更多人捍衛自己喜愛的生活方式和歷史價值。」於是，他們從自卑走向自豪。



















劉成和醬園
太子: 我亞公果代己開始做醬園，有104年歷史，我哋專做酒、醋、醬料……生意好好。個個都叫我太子，我係第三代傳人。我D客人個個都慕名而來。重建搞到我地無得做，有日我忍唔住畫咗一個破碎的心寫住「Broken Hearted」貼喺門口公告天下。後來太多我哋d報紙訪問要貼，就遮鬼住個Broken Heart嘞！







石叔: 我叫石叔，喺度做咗幾十年，我專門負責睇舖同包裝嘅，我貼喺玻璃樽上嘅招紙無人夠我貼得直架！我地D包裝好遷就到舊區嘅居民，兩蚊就有一包豆鼓，紥條橡筋搞掂。幾樽醋用尼龍繩幾下手勢就紮得好實，唔駛用膠袋都得。老街坊搬走咗都日日返嚟坐喺我哋酒酲上張長櫈度傾計，拆樓後，就無咗呢班朋友囉！



周叔: 我叫周叔，喺度做咗幾十年。睇住太子出世，我專門負責煑醬料，呢度D 面鼓醬全部係我用大銅鑊煑嘅，每次煮一百斤，一陣就賣晒嘞。我同太子老豆當年仲一齊研究點整D醋先好味，改良再改良。我以前賣涼果就最開心，可以趁D工廠女仔嚟買飯後涼果時約佢哋去荔園或者游早水。我果時好靚仔，好易搭訕啫！







哨牙林膠輪公司
我老豆叫哨牙林，佢由1969年就喺呢個舖做車呔生意架嘞！係呢行嘅老前輩，左鄰右里都識得佢。我哋喺度嘅時候，元州邨都未有。佢開舖果時諗唔到舖名，佢一班好朋友推薦佢就叫間舖做哨牙林膠輪啦，信譽保証吖嘛！



我小學五年級開始就同我家姐喺度幫手，我果時去游水唔駛用水泡架，用車軚入面黑色果D內喉就得架嘞！我大個咗之後，因為打電話訂貨，聽到個文員女仔把聲好聽又温柔，一聽就知好女仔啦！於是我就成日打電話訂貨，同佢足足傾咗成年電話至見面，最後仲娶咗佢做老婆添，真係千里姻緣一線牽！果一年，佢公司多咗好多生意架！而家我同仔女同老豆三代同堂，唔知幾開心！

諗返以前，我哋一路生活得好好哋，水災股災沙士都捱得過，估唔到比政府重建一手摧毀我哋咁多年嘅根基，對我地一家好大打擊。



蔬菜水果店
蔬菜水果店係我間舖個名，係我改嘅，喺呢個小小靠牆舖賣蔬菜水果，養活我同個仔，仲有八十年幾歲嘅阿媽。樓上同附近好多街坊嚟買我D菜，梗係啦！仲平過菜欄噃！嘩！果陣時我哋幾好呀！我攞好多菜返黎賣，一陣就賣晒嘞！以前喺呢個舖過嘅日子真係好開心，得閒仲可以同個仔同阿媽去飲茶添！



我賣果D散裝米好服務到D街坊架！如果唔係，樓上板間房D寡佬呀、天台D阿婆呀、D性生活工作者呀，邊有咁方便呀？成包米喺超市托返嚟D阿婆又唔夠力，無錢都可以買住少少先吖嘛！好少煑飯嘅買一大包米返去「藕」爛咩！我最近同政府D人見面，我問個經理：臘腸好唔好食呀？佢慒水水答：好食。我大聲鬧：好食呀呢！我成個雪櫃乜都無，淨係擺滿臘腸！點解呀？因為我俾你哋趕走晒D客，又迫我走，無錢開飯，搞全家日日食臘腸蒸飯呀！



新忠花店
我爸爸做花牌幾十年嘞，我自細就睇住佢做花牌。我廿幾歲正式跟阿爸學藝，佢手字真係寫得好靚。佢已經過咗身，我留住一大叠舊「圓包」，上面全部都係佢寫落嘅字。以前我有咩唔明，就可以問佢。宜家佢走咗，我唯有臨摹佢D字練習，漸漸領悟到點樣寫好D字。

我由製作花牌到寫字，到爬上竹棚砌花牌，都一手一腳做，多數嘅物料都可以循環再用，好環保！上竹棚後，係組件式砌積木咁砌上去嘅，隨客人喜好配搭唔同組件。我哋最長嘅組件十一呎，由閣樓搬落樓梯唔可以轉彎，樓梯一定要直上直落，好難揾舖，我自己都做咗廿幾年，無得做落去好唔捨得，唔知點算。



數年前，元州邨重建時，都有好多被遺棄嘅貓，我唔忍心見佢哋無人理，見一隻收養一隻。養番健康D就送比愛貓嘅街坊同朋友，等D小生命延續落去，唔好因為重建而失去安身之所，點知D貓宜家又要面對重建。



蘇記茶莊
我老爺以前喺潮洲做茶葉，又係中醫。我先生同我五十幾年前就係呢度開始做茶莊。我先生好勤力，又老實，我哋生意一路都做得好好。後來個仔大咗，佢讀書成績唔錯，本來考到海關，但係老豆都係想佢喺茶莊度幫手，我個仔好聽老豆話嘅﹐就接手做落去。我地以前日日一家人喺間舖過日子，好開心。我哋唔係求發達或者乜野，只求平平安安就滿足嘞，我先生早兩年過咗身，我同個仔要為咗佢好好守住呢間舖。



如果各位要買靚茶葉呢，唔應該只係問價錢，而係要問D茶葉嘅來源地，茶葉要地道先至好，即係要生長喺啱佢嘅氣候同土壤先至靚嘅。所以你睇我身後果D木箱，就見到晒我D茶葉由邊度嚟，識睇嘅人就知係地道嘅。我哋做咗咁多年，同D茶園建立咗交情，人哋每季先會留番果一年D靚茶葉比我哋。

我哋潮洲人好重視飲茶嘅，好講究，飲咗茶身體好，皮膚靚。我哋一壼功夫茶，一煲潮洲粥，食隻茶葉蛋就夠架嘞，健康又唔花錢。



朱記報紙檔
我阿爺四十幾年前就買咗呢個樓梯口賣報紙。果時樓上D街坊見有人幫手睇門口，都好歡迎佢，傳比我阿爸之後再傳到落嚟我哋幾兄妹。

為咗用盡梯口果少少位，我阿哥花咗好多心思整D架將D雜誌掛喺兩邊牆上。每次收檔都要執兩個鐘。後來索性開24小時唔收檔。我哋輪流分幾更看住。例如我收工就返去煑飯，自己食左就到舖頭，輪到阿哥阿妹分別返去食飯。我地好耐未試過同枱食飯嘞，不過為咗個檔口都值得嘅！



我加入咗街坊義工隊，跟重建嘅事之後，就成日俾食環署找麻煩，四十幾年嚟都未試過嘅。有次要封我哋個檔同拉我阿哥上差館，估唔到幾十個街坊熟客會企晒喺我個檔唔肯走，話要抬就抬咗佢[哋先。我真係好感激佢地幫忙。最後我哋企咗幾個鐘，食環署唯有收隊走人。



富貴城遊戲機
我46歲，入行卄幾年，喺呢區都有十一年嘞。我以前喺紅磡、大角咀都做過，不過治安最好都係深水埗。我靠呢個舖養活一家五口，重建令我無咗個娛樂牌照，我都唔知以後點算。



我呢度一蚊打兩舖機，平過大陸。最近好興打Spike Out，D客唔夠四個人，就會指明要我落場戥腳。呢個Game可以比四個人合作打大佬，一關過完升另一關，要好團結至得，我夠晒落力，所以好受D客歡迎。我d戰友除咗佢哋，仲有我班街坊，我哋合力應付政府，咪好似打機咁囉，一關過咗下一關仲難打，唔齊心點得？
因為重建呢件事，我識到一班好朋友，唔止識咁簡單，仲要係好熟果隻。我D好朋友有周綺薇啦、李瑞強啦、馮錦新啦、仲有朱小姐、黃生、林伯、雷伯佢哋。我希望大家共同進退打爆機，搞得掂以後嘅生活。



新聯機器廠
我哋呢行係做塑膠機器加工嘅，30年前，我同兩個師弟開咗呢間舖。我兩個師弟好尊重我，咁多年嚟都比我話晒事。我哋呢個舖，養得起三家人，生意好好，我哋咁多年都無試過為間舖或者錢銀鬧過交，真係好難得！幾十年嚟，我哋同d伙記、客人都從來唔鬧交嘅。過時過節我哋三家人都會同埋D伙記一齊出去食飯，好熱鬧架！

重建搞到我哋無得做落去，真係好唔捨得。D街坊集合起嚟我好支持，無地方開會，我比埋鎖匙佢哋自出自入。我咁無所謂嘅人，政府都迫到我今次一定要企硬！我哋要求已經低無可低，佢都出律師信恐嚇我哋！今次我哋一定唔會再讓步！



大眾膠輪
我呢間車房叫大眾膠輪，喺呢頭做咗33年，個個都識得我嘞，連以前洗衣舖嘅招牌都唔駛換啦!我老豆都做呢行，退咗休日日落嚟坐吓，佢話坐喺條街度，有好多嘢睇喎。我好鍾意自己間舖，租又平，位置又好。我放喺舖賣果架老爺車MG係我花咗好多心機先整番好嘅。架黃色開蓬MINI呢，仲比我個女結婚時做花車添！真係幾型呀！做呢行係我嘅志向。



我喺度養過兩隻走地雞，隻雞乸會每日生兩隻蛋，我都會留番比我老婆食。佢哋仲識過馬路。我細佬用塗改液幫隻黑色沙皮狗畫左條白色Nike眉，佢好鍾意自己去行街，有個客話喺旺角見過佢，一睇條眉就認得。我仲養過貓頭鷹同穿山甲，隻貓就自己走嚟嘅。我最鍾意就梗係識講好多嘢果隻鸚鵡啦！佢見到我老婆會講：靚女，去街呀？每朝開舖，就會有好多老人家、細路仔圍住同佢傾計，仲帶埋D糖果呀餅乾呀餵佢食。

Nikon D70s
Tokina 12-24mm F4
http://www.flickr.com/photos/mansonkin/sets/72157602122933053/




知多一點：
深水埗k20-23重建區、媒體報導、深水埗重建：請還我公民知權、深水埗重建之文化無聲消逝